Димаш Құдайбергеннің әні халықаралық жазғы чартта үшінші орын алды
Финалдық тізімге 20 ән енді.
Димаш Құдайбергеннің AQERKE әні халықаралық Channel R Radio радиостанциясының қорытынды жазғы чартының үздік үштігіне енді. Нәтиже тыңдармандардың жаһандық дауыс беруі арқылы анықталған, деп хабарлайды Tizgin.kz.
Channel R Radio туралы
Channel R – заманауи танымал музыка мен жаңа релиздерге маманданған тәулік бойы жұмыс істейтін онлайн-радиостанция. Радио жарнамасыз хабар таратып, әлемнің түкпір-түкпіріндегі тыңдармандарға өз қосымшасы және iHeartRadio, Audacy, TuneIn, Apple Music секілді танымал стримингтік платформалар арқылы қолжетімді.
Чарт тыңдармандардың дауыс беруі арқылы анықталды
#UltimateSummerCountdown жазғы рейтингі жанкүйерлердің жаһандық дауыс беруі нәтижесінде жасалды. Финалдық тізімге 20 ән енді. Ал әндердің нақты орындарын әлемнің әр түкпірінен дауыс берген Channel R тыңдармандары анықтады. Дауыс беру 3 қыркүйекте аяқталып, қорытынды рейтинг 5 қыркүйекте жарияланды.
AQERKE үшінші орынға жайғасты
Нәтижесінде Димаш Құдайбергеннің «AQERKE» әні қорытынды рейтингте үшінші орын алды. Осылайша ән халықаралық Channel R аудиториясының таңдауы бойынша жаз маусымындағы ең танымал үш әннің қатарына кірді.