2026 жылдың екінші тоқсанында Қазақстан экономикасының түрлі салаларында 9,4 млн адам жұмыспен қамтылған. Кейінгі бір жылда жылжымайтын мүлік, білім беру және денсаулық сақтау салаларында жұмыс істейтіндер саны айтарлықтай өсті, деп хабарлайды Tizgin.kz Ұлттық статистика бюросына сілтеме жасап.
Әрбір алтыншы адам сауда саласында еңбек етеді
Ұлттық статистика бюросы жүргізген халықты жұмыспен қамту жөніндегі іріктемелі зерттеудің нәтижесіне сәйкес, елдегі 9,4 млн жұмыспен қамтылған адамның 7,3 миллионы жалдамалы қызметкер санатына жатады. Тағы 2,1 млн адам өзін-өзі жұмыспен қамтыған.
Қазақстандағы жұмыспен қамтылғандардың ең үлкен бөлігі сауда саласында еңбек етеді. Бұл сектордың жалпы жұмыспен қамту құрылымындағы үлесі 16,8 пайызды құрады.
Одан кейін білім беру – 13,3 пайыз, өнеркәсіп – 12,4 пайыз және ауыл шаруашылығы – 10,5 пайыз көрсеткішпен орналасқан.
Сондай-ақ жұмыспен қамтылғандардың 7,1 пайызы көлік және қоймалау саласында, 6,8 пайызы құрылыста, ал 6,6 пайызы денсаулық сақтау және әлеуметтік қызмет көрсету саласында жұмыс істейді.
Жылжымайтын мүлік саласы өсім бойынша алға шықты
2025 жылдың екінші тоқсанымен салыстырғанда бірнеше салада жұмыспен қамтылғандар саны артқан. Ең жоғары өсім жылжымайтын мүлікпен жасалатын операциялар саласында тіркелді. Бір жыл ішінде бұл секторда еңбек ететіндер саны 37 мың адамға көбейген.
Білім беру саласындағы жұмыспен қамтылғандар саны 31,1 мың адамға, денсаулық сақтау және әлеуметтік қызмет көрсету саласында 21,2 мың адамға артты.
Өнер, ойын-сауық және демалыс салаларында жұмыс істейтіндер саны 15,1 мың адамға көбейген. Ал кәсіби, ғылыми және техникалық қызмет саласында өсім 7,7 мың адамды, қаржы және сақтандыру қызметінде 7,4 мың адамды құрады.
