Арқалық әуежайының құрылысы аяқталып, нысан барлық қажетті сертификатты алды. Алғашқы әуе рейсін 22 тамызда қабылдау жоспарланып отыр. Ал 1 қыркүйектен бастап Арқалықтан Алматы, Қостанай және Астанаға тұрақты рейстер орындалады, деп хабарлайды Tizgin.kz Қостанай облысының әкімі Құмар Ақсақаловқа сілтеме жасап.
Әуежай CRJ200 ұшақтарын қабылдауға дайын
Құмар Ақсақаловтың мәліметінше, Арқалық әуежайының құрылысы Мемлекет басшысының тапсырмасына сәйкес жүргізілген. Қазір нысанды сертификаттауға қатысты барлық рәсім толық аяқталды.
3 тамызда әуежайдың авиациялық қауіпсіздік қызметіне №8/26 сертификаты берілді. 18 тамызда «Қазаэронавигация» РМК аэронавигациялық қызмет көрсетуші ретіндегі №21 сертификатты алды. Ал 21 тамызда әуежайға АРД сериялы №KZ01VKC00000389 аэродромның жарамдылық сертификаты табысталды.
Осылайша, Арқалық әуежайы CRJ200 үлгісіндегі өңірлік жолаушылар ұшақтарын қабылдауға және оларға қызмет көрсетуге дайын.
Әуе бағыттарына қызмет көрсететін компанияны анықтау үшін өткізілген конкурста SCAT әуе компаниясы жеңімпаз атанды. Әуежай алғашқы рейсті 22 тамызда қабылдайды.
Тұрақты рейстер аптасына екі рет орындалады
1 қыркүйектен бастап рейстер әр сейсенбі және сенбі күндері қатынайды.
Сейсенбі күнгі рейстер кестесі:
- Алматы – Арқалық: 08:50–10:50;
- Арқалық – Қостанай: 11:50–12:40;
- Қостанай – Арқалық: 13:40–14:30;
- Арқалық – Астана: 15:30–16:20;
- Астана – Арқалық: 17:50–18:40;
- Арқалық – Алматы: 19:40–21:35.
Сенбі күнгі рейстер кестесі:
- Алматы – Арқалық: 08:40–10:40;
- Арқалық – Қостанай: 11:40–12:30;
- Қостанай – Арқалық: 13:30–14:20;
- Арқалық – Астана: 15:15–16:05;
- Астана – Арқалық: 17:35–18:25;
- Арқалық – Алматы: 19:25–21:15.
Облыс әкімінің айтуынша, Арқалық әуежайының қайта іске қосылуы Торғай өңірінің көлік қолжетімділігін арттырып, елді мекендердің әлеуметтік-экономикалық дамуына жаңа мүмкіндік береді.
