Шығыс Қазақстанда ауылдардың өрт қауіпсіздігін қамтамасыз ету күшейтілуде. Зайсан ауданының Біржан және Сарытерек ауылдарында жаңа өрт сөндіру бекеттері ашылды. Олар өрт пен төтенше жағдайларға жедел әрекет етуге мүмкіндік береді, деп хабарлайды Шығыс Қазақстан облысының әкімдігі.
Біржан ауылындағы бекет елдегі «Ауыл құтқарушылары» ерікті өртке қарсы құрылымдарының 238-шісі болады. Оның құрылысына бюджеттен тыс шамамен төрт миллион теңге қаражат жұмсалды. Бекет тұрғындар саны екі мыңнан асатын үш елдімекеннің қауіпсіздігін қамтамасыз етеді.
Мұнда тәулік бойы кезекшілік ұйымдастырылған. Еріктілер арнайы оқытудан өтті, ал бекет өрт сөндіру техникасымен, қажетті құрал-жабдықтармен, байланыс құралдарымен және арнайы киіммен қамтамасыз етілді. Бұл жергілікті тұрғындарға негізгі бөлімшелер келгенге дейін, оқиғаның алғашқы минуттарында көмек алуға мүмкіндік береді.
Сарытерек ауылында да жаңа өрт сөндіру бекеті салынып, пайдалануға берілді. Оны ашуға демеушілік көмек аясында бюджеттен тыс 5,74 млн теңге қаражат бағытталды. Мұнда бір ауысымда екі құтқарушы мен өрт сөндіру көлігінің жүргізушісінің жұмыс істеуіне қажетті жағдай жасалған.
Нысандардың ашылуына Шығыс Қазақстан облысы әкімінің орынбасары Бақытжан Байахметов, Зайсан ауданындағы жергілікті атқарушы органдар мен ТЖД өкілдері, қоғам белсенділері және ауыл тұрғындары қатысты.
Өңір үшін қауіпсіздік жүйесінің ірі елдімекендерде ғана емес, әр ауылда қолжетімді болуы маңызды. Сондықтан жергілікті өрт сөндіру бекеттері мен ерікті өртке қарсы құрылымдарды дамыту тұрғындар мен олардың мүлкін қорғау бағытындағы жұмыстың практикалық бағыттарының бірі болып қала береді.1312:48
