Сирияның бұрынғы президенті Башар Асад сырттай өлім жазасына кесілді. Осындай үкім оның інісі Махер Асад пен немере туысы Атеф Наджибке де шығарылды. Сот оларды адамзатқа қарсы және әскери қылмыстар жасағаны үшін кінәлі деп таныды, деп хабарлайды Tizgin.kz.
Үкім Асад билігі құлағаннан кейін шығарылды
Башар Асад пен оның інісі Махер Асад сот процесіне қатысқан жоқ. Екеуі де 2024 жылғы желтоқсанда Асад билігі құлағаннан кейін Ресейге қашқан. Ал Атеф Наджиб сот залында болды. Ол үкімді сотталушыларға арналған тордың ішінде, түрме киімімен тұрып тыңдады.
Наджиб бұған дейін Сирия армиясында бригадалық генерал шенін иеленіп, Дараа провинциясындағы саяси қауіпсіздік басқармасына жетекшілік еткен. Сот оны 2011 жылы басталған наразылықтарды қатыгездікпен басуға басшылық жасады деп таныды.
Дараадағы оқиғалар Сириядағы көтерілістің басталуына түрткі болған негізгі жағдайлардың бірі саналады. Кейін бұл толқулар ұзақ жылдарға созылған азаматтық соғысқа ұласты. 14 жыл ішінде қақтығыс салдарынан шамамен жарты миллион адам қаза тапты.
Асад Ресейде қалды
Башар Асадтың билігі 2024 жылғы желтоқсанда Сирия оппозициясының күштері Дамаскіге кіргеннен кейін құлады. Осыдан соң бұрынғы президент інісімен бірге елден кетіп, Ресейге қашты. Кейінірек Асад Дамаскіден алдымен Латакияға аттанып, ондағы Ресейдің Хмеймим әскери әуе базасында болғанын айтқан.
