Ұлттық қауіпсіздік комитеті Оңтүстік Корея Республикасының 14 азаматын ұстады. Олар өз елінде телекоммуникациялық жүйелерді пайдалану арқылы алаяқтық жасаған ұйымдасқан қылмыстық топқа қатысы бар деген күдікке ілінген, деп хабарлайды Tizgin.kz.
ҰҚК мәліметінше, арнайы операция 23 шілде күні жүргізілген. Қазіргі уақытта ұсталған азаматтарға қатысты Оңтүстік Кореяның құқық қорғау органдары ұйымдасқан қылмыстық топ құрамында алаяқтық жасау фактісі бойынша қылмыстық іс тергеп жатыр.
«Тұрғылықты жерлерінде жүргізілген тінту барысында заңсыз қызметте пайдаланылған компьютерлік техника, ұялы телефондар мен ноутбуктер анықталды», – деп хабарлады Ұлттық қауіпсіздік комитеті.
Ұсталғандар процессуалдық іс-шараларды жүргізу үшін уақытша ұстау изоляторына қамалды. Тергеу әрекеттері аяқталғаннан кейін Оңтүстік Корея азаматтарын Қазақстаннан депортациялау жоспарланып отыр.
