Шымкентте қала әкімінің орынбасары Руслан Берденовке қастандық жасау ісі бойынша басты сот отырысы басталды, деп хабарлайды Tizgin.kz порталы Tengrinews.kz-ке сілтеме жасап.
Сот отырысы ашық түрде, қазақ тілінде өтіп жатыр.
Отырыс басталар алдында залға екі мемлекеттік айыптаушы, айыпталушының жұбайы, қала әкімінің орынбасары Руслан Берденовтің өкілі және олардың қорғаушылары кірген.
Отырыс басталар алдында журналистерді залға кіргізбей қойды, оларға тыңдау басталғанға дейін дерлік төменгі қабатта күтуге тура келді.
БАҚ өкілдеріне сот отырысы өтіп жатқан залда болуға рұқсат берілді. Айыпталушы сот ғимаратына полиция көлігімен, конвоймен жеткізілді.
БЕРДЕНОВКЕ ҚАСТАНДЫҚ
Еске сала кетейік, 28 шілде күні таңертең Шымкент қаласының мамандандырылған ауданаралық қылмыстық істер жөніндегі сотында Руслан Берденовке қастандық жасау ісі бойынша алдын ала тыңдау өткен еді.
Айта кетейік, алдын ала тыңдауға Руслан Берденовтің өзі қатысқан жоқ. Оның өкілі сотқа қазір қала әкімінің орынбасары ем алып жатқанын хабарлаған. Сот Берденовке негізгі сот процесіне жеке өзі қатысуға міндеттеме жүктеді.
Сондай-ақ, сотта Руслан Берденовке жасалған қастандықтың себебі айтылды. Прокурор Бауыржан Караманов айыптау актісін оқып берді, онда оқиғаның мән-жайы егжей-тегжейлі баяндалған.
Іс материалдарына сәйкес, 2025 жылдың 21 сәуірінде айыпталушы Ернар Жиенбай Шымкент қалалық құрылыс басқармасының салынып жатқан нысандарға мониторинг жүргізу бөлімінің басшысынан ақпарат алған. Ол Жиенбайға қала әкімінің орынбасары Руслан Берденовтің тапсырмасымен «Тұрғын үй Шымкент» ЖШС директоры қызметінен өз еркімен кетуі тиіс екенін жеткізген.
Бұл іс бойынша күдікті ретінде Ернар Жиенбай өтіп жатыр. Ашық түрде өткен алдын ала тыңдау барысында судья айыпталушының сот процесі кезінде өзінің бейнесін түсіруге қарсы екенін айтты.
Жиенбайға Қылмыстық кодекстің 24-бабының 3-бөлігі және 99-бабының 1-бөлігі бойынша («Адам өлтіруге оқталу») айып тағылып отыр. Кейбір БАҚ мәліметінше, күдікті бұған дейін «Тұрғын үй Шымкент» ЖШС-ін басқарған.
