Қазақстан халық партиясының бұрынғы төрағасы Ермұхамет Ертісбаев журналист Асхат Ниязовқа берген сұхбатында өзін билік жүйесінен ҰҚК бұрынғы төрағасы Кәрім Мәсімов ығыстарғанын айтты, деп хабарлайды Tizgin.kz.
Ертісбаев 2013 жылдан кейін басқа мемлекетке елші болып кеткенін айтады.
“Ашығын айтсам, мені Мәсімов ығыстырды. Президент әкімшілігіне ол барғаннан кейін мені ол жерден көргісі келмеді. Жүрегіме жүк түсіп кеттім, бірақ тағдырға қазір шексіз ризамын, себебі мен екі елге барып қызмет етіп, дипломатиялық қызметтің не екенін түйсіндім. Ол құпияларды бүгін айта аламын”, – дейді ол.
Ертісбаев 2008 жылы Назарбаев өзін мәдениет және ақпарат министрі қызметінен алып тастағанын айтады. Сол тұста Назарбаев оған ашық түрде ол лауазымды Мұхтар Құл-Мұхамедке беретінін айтқан көрінеді.
Кәрім Мәсімов – Қазақстанның бұрынғы ірі шенеунігі. Ол әр жылдары премьер-министр, Президент әкімшілігінің басшысы және ұлттық қауіпсіздік комитетінің (ҰҚК) төрағасы қызметтерін атқарған. Тәуелсіз Қазақстан тарихындағы ең ұзақ қызмет еткен премьер-министрлердің бірі саналады.
2022 жылғы Қаңтар оқиғасынан кейін ҰҚК төрағасы қызметінен босатылып, мемлекетке опасыздық жасау, билікті күшпен басып алуға әрекеттену және қызметтік өкілеттігін асыра пайдалану баптары бойынша сотталған. 2023 жылы сот үкімімен 18 жылға бас бостандығынан айырылған.
