Тарихтағы ең қымбат әлем чемпионаты: Ұлттық құрамалар қанша қаржы тапты

2026 жылы АҚШ, Канада және Мексикада өткен футболдан әлем чемпионаты жүлде қорының көлемі бойынша рекорд орнатты. Турнирге қатысушыларға жалпы 871 миллион АҚШ доллары көлемінде сыйақы төленді, деп хабарлайды Tizgin.kz.

Турнирдің жеңімпазы финалда Аргентинаны жеңген Испания құрамасы атанып, ең ірі қаржылай сыйақыны иеленді.

Испания 51 миллион доллар алды

Егер 2022 жылы Катарда өткен әлем чемпионатының жеңімпазы Аргентина құрамасы 42 миллион доллар алған болса, жаңа әлем чемпионы Испанияның жүлдесі 51 миллион долларға дейін өсті.

Турнир қорытындысы бойынша жүлде қоры төмендегідей бөлінді:

• Әлем чемпионы – Испания: 51 миллион доллар;
• Күміс жүлдегер – Аргентина: 34 миллион доллар;
• Қола жүлдегер – Англия: 30 миллион доллар;
• Төртінші орын алған Франция: 28 миллион доллар;
• Ширек финалға шыққан командалар: әрқайсысы 20 миллион доллар;
• 1/8 финалда тоқтаған құрамалар: әрқайсысы 16 миллион доллар;
• 1/16 финалға дейін жеткен командалар: әрқайсысы 12 миллион доллар;
• Топтық кезеңнен аса алмаған құрамалар: әрқайсысы 10 миллион доллар.

ФИФА жол шығындарын толық өтеді

Чемпионат бірден үш елде өткендіктен, ұлттық құрамалардың ұшу, тұру және логистика шығындары айтарлықтай артты. Осыған байланысты ФИФА қосымша 100 миллион доллардан астам қаражат бөлді.

Ұйым әрбір ұлттық федерацияның 50 адамнан тұратын делегациясының екі бағыттағы әуе билеттерін, қонақүйде тұруын, тамақтануын, ішкі көлік шығындарын және қызметтік автокөліктерін толық қаржыландырды.

Алғаш рет чемпиондық сақиналар табысталады

Қаржылай сыйақымен қатар, Испания құрамасының футболшылары мен жаттықтырушылар штабы ФИФА арнайы тапсырыспен әзірлейтін чемпиондық сақиналарға ие болады.

Мұндай марапат футболдан әлем чемпионаттары тарихында алғаш рет табысталмақ. Бұл жаңашылдық NBA, NHL және NFL сияқты Солтүстік Американың кәсіби спорт лигаларының дәстүрінен шабыт алған.

Сақиналар қолмен жасалады. Оның бір бетінде Әлем кубогының бейнесі, екінші бетінде Испания құрамасының рәміздері және әрбір футболшының жеке нөмірі бейнеленеді.

Финалдық матчтан кейін чемпиондық сақиналар Испания құрамасының капитаны мен бас бапкеріне табысталды. Қалған ойыншылар өз марапаттарын сақиналар жеке өлшем бойынша дайын болғаннан кейін алады.

Еске сала кетсек, бұған дейін ФИФА 2026 жылғы әлем чемпионатының үздік ойыншыларын атағанын жаздық.

Турнирдің үздік жас ойыншысы деп Испания құрамасының қорғаушысы Пау Кубарси танылды. Ал үздік қақпашы атағы испаниялық Унаи Симонға бұйырды.

Франция құрамасының шабуылшысы Килиан Мбаппе 10 гол соғып, әлем чемпионатының үздік сұрмергені атанды. Ол «Алтын бутсы» жүлдесін иеленді.

Ал Франция құрамасының тағы бір ойыншысы Майкл Олисе жеті нәтижелі пас беріп, турнирдің үздік ассистенті атанды.