Қазақстан Қарулы күштерінде алғаш рет «Киберқауіпсіздік» әскери-есептік мамандығы бойынша даярланған запастағы офицерлерге диплом табысталды. Бұл туралы Қорғаныс министрлігінің баспасөз қызметі хабарлады, деп жазады Tizgin.kz.
170-тен астам офицер мен сержант оқуын аяқтады
Радиоэлектроника және байланыс әскери-инженерлік институтында 170-тен астам запастағы офицер мен сержанттың даярлығы аяқталды. Биылғы түлектердің арасындағы басты жаңалық – Қазақстан Қарулы күштері тарихында алғаш рет «Киберқауіпсіздік» әскери-есептік мамандығы бойынша запастағы офицерлердің дайындалуы.
Мамандар қандай даярлықтан өтті
Оқу барысында болашақ офицерлер ақпараттық жүйелерді қорғау, кибершабуылдардың алдын алу және оларға қарсы іс-қимыл жасау бағытында тәжірибелік дайындықтан өтті.
Ал «Байланыс» мамандығы бойынша білім алған запастағы сержанттар заманауи байланыс құралдарын орналастыру және пайдалану тәсілдерін меңгерді.
Әуе қорғанысы мамандары да дайындалып жатыр
Қорғаныс министрлігінің мәліметінше, 2025 жылдан бастап институтта әуе шабуылына қарсы қорғаныс мамандығы бойынша да запастағы офицерлер даярланып келеді. Ведомство қазіргі таңда ұшқышсыз ұшу аппараттарының кеңінен қолданылуына байланысты мұндай мамандардың елдің әуе кеңістігін қорғаудағы рөлі арта түсетінін атап өтті.
Киберқауіпсіздік саласындағы ынтымақтастық күшейтіледі
Бұған дейін Қорғаныс министрлігі бірқатар қазақстандық ұйымдармен ынтымақтастық туралы меморандумдарға қол қойған болатын. Құжаттар аясында тараптар ақпараттық жүйелерді қорғау технологияларын дамытуға, киберқауіпсіздік саласындағы мамандарды даярлауға және бірлескен ғылыми-зерттеу жобаларын жүзеге асыруға уағдаласқан.
