Адвокат Мейірман Шекеев әлеуметтік желідегі парақшасында бір топ жігіттің қолынан көз жұмған Шерзат Полаттың ағасы Нұрқанат Ғайыпбаевтың ісі тоқтатылатынын жазды, деп хабарлайды Tizgin.kz.
2024 жылы 9 желтоқсанда Талғар шетіндегі зират маңынан Нұрқанаттың денесі табылған еді. Ол түнде үйінен шығып кеткен. Таңертең ағаш түбінде асылған күйіндегі денесі табылған. Полиция сол тұста Нұрқанаттың өз-өзіне қол салғаны турасында ақпарат таратқан. Алайда Шерзаттың әкесі Қаржаубай бұл нұсқаға сенбей, наразылық білдіріп, полицияға қарсылық көрсетіп, сол үшін әкімшілік жазаға тартылған-тын.
Шерзат Полаттың сотында Нұрқанаттың тергеу кезіндегі берген жауаптары жарияланып, берген жауаптары оқылған. Сол жауаптар сотта маңызды материал ретінде іске тіркелген еді.
ҮКІМ
Айта кетейік, 5 маусымда Талғарда кісі қолынан мерт болған жасөспірім Шерзат Полаттың ісі бойынша сот процесі шегіне жеткен. Сотта төрелік еткен судья Ержан Жанұзақовтың үкімімен: Абзал Шынасыл 23 жылға сотталды.
Равиль Сакиев 20 жыл, Шыңғыс Белғожаев 7 жыл; Дархан Әскентай 7 жыл, Нұрқияс Ілиясов 9 жыл (бұрынғы 2,5 жылға шектеу жазасын қосқанда); Нұрбол Тоқтаубаев 7 жыл, Азамат Тоқтаубаев 15 жыл (бұрынғы жазасын бірге қосқанда), Дидар Қалиахмет 7 жылға, кәмелетке толмаған Думан Ысқақ қылмыстық кодекстің 434-бап (ауыр қылмыс жасалғанын хабарламау) 1,5 жылға сотталды. Оның изолятордағы бір күні екі күн ретінде есептелетін болды.
