Ресей үкіметі шетелден бензин сатып алатын мұнай компанияларына субсидия беруді көздейтін салық кодексіне түзетулер әзірледі. Ресейдегі бензин тапшылығы ішкі тұтыну көлемінің шамамен 20 пайызына жетіп отыр, деп хабарлайды DW.
Ресей билігі елдегі жанармай тапшылығын жабу үшін Үндістаннан бензинді жаппай импорттауды жоспарлап отыр. Бұл туралы 23 маусым, сейсенбі күні РБК Ресей мемлекеттік думасының бюджет және салық комитеті Ресей үкіметі енгізген салық кодексіне түзетулерді қолдағанына сілтеме жасап хабарлады. Аталған түзетулер, атап айтқанда, шетелден бензин сатып алатын мұнай компанияларына бюджеттен субсидия бөлуді көздейді.
Басылымның мәліметінше, Еуразиялық экономикалық одақтан (ЕАЭО) тыс жерде өндірілген импорттық бензинге берілетін субсидия мөлшері Үндістан нарығындағы бензиннің индикативтік бағасы мен оны Үндістан порттарынан жеткізу шығындары негізінде есептеледі. Субсидиялар сегіз жыл бұрын жанармайдың бөлшек сауда бағасын ұстап тұру үшін іске қосылған демпферлік механизм аясында төленеді.
Ресей мұнайының негізгі импорттаушылары
Үндістан Қытай және Түркиямен қатар Ресей мұнайының ең ірі сатып алушыларының бірі саналады. Бұл үш елге Ресейдің жалпы мұнай экспортының шамамен 98 пайызы тиесілі.
Сонымен қатар Украинадағы соғыс басталғаннан кейін Үндістан ресейлік Urals маркалы мұнайын теңіз арқылы жеткізу бойынша абсолютті көшбасшыға айналды. 2026 жылдың маусым айында бұл ел тәулігіне 2,66 миллион баррельге дейін ресейлік мұнай қабылдап отырған.
Үндістан Ресей мұнайының бір бөлігін бензин мен дизель секілді мұнай өнімдері түрінде қайта экспорттайды. Энергетика саласындағы деректерді талдау және консалтингке маманданған халықаралық Wood Mackenzie компаниясының бағалауынша, 2025 жылы үнді бензинінің экспорттық сатылымы рекордтық деңгейге – тәулігіне 400 мың баррельге жеткен. Оның негізгі сатып алушылары Азия елдері болған.
Ресейдегі бензин тапшылығы және оның себептері
Сараптамалық агенттіктердің деректеріне сәйкес, Ресейдің Украинаға қарсы толыққанды соғысының бесінші жылында ресейлік мұнай өңдеу зауыттарына жасалған нысаналы шабуылдардың салдарынан елдегі мұнай өңдеу көлемі соңғы жиырма жылдағы ең төменгі деңгейге түскен, ал бензин өндірісі 25 пайызға қысқарған. Reuters агенттігінің мәліметінше, қазіргі таңда Ресейдегі бензин тапшылығы ішкі тұтынудың шамамен 20 пайызына жетіп отыр.
Бірқатар өңірдің билігі жанармай сатуға шектеулер енгізді. Ал аннексияланған Қырымда 21 маусымнан бастап жеке және заңды тұлғаларға жанармай сату тоқтатылған. Мәскеу тағайындаған Қырымның «басшысы» Сергей Аксенов ресейлік Max мессенджеріндегі жазбасында бензин мен дизель тек түбектің тіршілігі мен қауіпсіздігін қамтамасыз ететін қызметтер үшін ғана қолжетімді екенін мәлімдеді.
