PhD түлектері мектептерде жұмыс істей алады: жаңа заң қабылданды
Мықты ғалымдар тек жоғары оқу орындарында ғана емес, мектептерде де аса қажет.
Енді грантпен докторантураны (PhD) бітірген азаматтар мектептерде және басқа да білім беру ұйымдарында еңбек етіп, міндетті жұмыс өтеу мерзімін өтей алады. Ұсынылған авторлық түзетулер заң болып бекітілді. Бұл туралы Мәжіліс депутаты Асхат Аймағамбетов айтты, деп хабарлайды Tizgin.kz.
Оның айтуынша, бұрын докторанттар оқу бітірген соң жоғары оқу орындарында, ғылыми институттарда немесе мемлекеттік органдарда жұмыс істеуге міндетті болатын.
«Ал іс жүзінде біздің мектептерге және басқа да білім беру ұйымдарына дәл осындай терең білімі бар мықты PhD докторлары өте қажет еді, бірақ қатал норманың кесірінен жас мамандар мектепке бара алмайтын, өйткені ол жақтағы жұмыс міндетті өтеу мерзімі ретінде есептелмейтін. Біз бұл кедергіні алып тастадық», – дейді Асхат Аймағамбетов.
Оның айтуынша, мықты ғалымдар тек жоғары оқу орындарында ғана емес, мектептерде де аса қажет.
«Мектептер мен білім беру ұйымдары мықты кадрлармен күшейеді. Балаларымыз заманауи зерттеушілерден тікелей дәріс алады. Түлектерге таңдау беріледі. Олар тек жоғары оқу орындарымен шектелмей, орта білім беру саласында да кедергісіз қызмет ете алады. Ондағы жұмыс өтеу мерзімі заңды түрде толық есептеледі», – дейді ол.