Ақтауда тағы бір ерекше құс көзге түсті
Облыс орталығының тұрғыны жергілікті өңірге жиі кездесе бермейтін тағы бір құсты — сарыторғайды видеоға түсіріп алды.
Құстың ашық сары түсті қауырсыны көптің назарын аударды: ол ағаштың бұтағында отырған, деп хабарлайды Tizgin.kz порталы Lada.kz-ға сілтеме жасап.
«ECO-SOCIAL» қоғамдық бірлестігінің атқарушы директоры және Орталық Азиядағы Рамсар аймақтық бастамасының үйлестіру комитеті төрағасының орынбасары Әділбек Қозыбақов бұл құстың сирек түрге жатпайтынын айтты. Оның айтуынша, Ақтауда бұл құсты кейде тек көктем мен күз мезгілдерінде ғана кездестіруге болады.
«Бұл — кәдімгі сарыторғай. Ол қоңыржай ендіктерде ұя салады. Негізінен жәндіктер және жидектермен қоректенеді. Қысты Азия мен Африканың тропикалық аймақтарында өткізеді. Біздің өңірде тек ұшып өту кезінде, яғни көктем мен күзде ғана кездеседі», — дейді Әділбек Қозыбақов.
Кәдімгі иволга (лат. Oriolus oriolus) — шағын әрі жарқын түсті құс, иволгалар тұқымдасының жалғыз өкілі, Солтүстік жарты шардың қоңыржай климатында кең таралған. Еуропада және Азияда, шығыста Енисейге дейінгі аймақтарда ұялайды. Шулы әрі өте қозғалысқа бейім, көбіне ағаштардың, әсіресе жапырақты ағаштардың ұшар басында жүреді, сондықтан ашық түсіне қарамастан көзге көп түсе бермейді.
Көпшілікпен араласпайды, көбіне жалғыз немесе жұп болып кездеседі. Аталығы ерекше: алтын-сары түсті, қанаттары мен құйрығы қара. Аналығы мен жас құстар негізінен жасыл-сары реңді, құрсақ тұсында жіңішке қара жолақтары болады. Тұмсығы айтарлықтай жуан, қызғылт-қызыл түсті. Негізінен жұлдызқұрттармен және басқа да жәндіктермен, сондай-ақ жидектермен қоректенеді. Ұзақ қашықтыққа қоныс аударады, қысты Азия мен Африканың тропикалық аймақтарында өткізеді.
Еске сала кетейік, 29 сәуір күні жергілікті тұрғындар аймақ үшін сирек кездесетін тағы бір құс — қамыс құсын видеоға түсіріп алған. Ол тұрғын үй маңында еркін жүріп жүрген.