Kaspi.kz компаниясы халықаралық қаржы нарығында жаңа еурооблигациялар орналастыру процесін бастады. Бұл туралы Astana International Exchange (AIX) алаңында ресми хабарлама жарияланды.
Мәліметке сәйкес, компанияның 5 жылдық облигациялары бойынша инвесторлардан өтінім қабылдау (букбилдинг) 21 сәуір күні Астана уақытымен 16:35-те басталып, 18:00-ге дейін жалғасады. Бұл кезеңде инвесторлардың сұранысы зерттеліп, бағалы қағаздардың нақты орналастыру бағасы анықталады.
Аталған облигациялар АҚШ заңнамасындағы 144A ережесіне сай ұсынылып отыр. Бұл – негізінен ірі халықаралық инвесторларға бағытталған қаржы құралы екенін білдіреді.
Орналастыру процесін әлемдік қаржы нарығындағы ірі ойыншылардың бірі – J.P. Morgan Securities plc үйлестіреді.
Сарапшылардың айтуынша, Kaspi.kz-тің бұл қадамы компанияның халықаралық нарықтағы позициясын күшейтіп, шетелдік инвесторлармен жұмысын кеңейтуге мүмкіндік береді.
