Астанада 15-22 сәуір аралығында «Құқықтық мәдениет» атты құқықтық сауаттылық марафоны басталды. Ауқымды жоба білім беру ұйымдарының базасында ұйымдастырылып, оқушылар мен студенттердің құқықтық санасын қалыптастыруды көздейді. Бір аптаға созылатын іс-шаралар сериясы заң үстемдігін түсіндіруді жаңа, интерактивті форматта ұсынбақ, деп хабарлайды Tizgin.kz.
Құқықтық мәдениетті қалыптастыратын жүйелі жоба
«Құқықтық мәдениет» марафоны – өскелең ұрпақтың құқықтық санасын жаңғыртуға бағытталған кешенді әрі көпдеңгейлі ағартушылық алаң. Бұл бастама білім беру жүйесі мен құқық қорғау органдары, сондай-ақ азаматтық қоғам институттары арасындағы өзара ықпалдастықты күшейтіп, теория мен тәжірибені ұштастыруға мүмкіндік береді.
Марафонның негізгі мақсаты – білім алушылардың құқықтық сауаттылығын арттырып қана қоймай, оны күнделікті өмірде қолданылатын дағды деңгейіне жеткізу. Яғни, заңға бағынатын мінез-құлық моделін қалыптастырып, жауапты азамат тәрбиелеу басты басымдық ретінде белгіленген.
Осы орайда Астана қаласы Білім басқармасының басшысы Қасымхан Сенғазыев бастаманың маңызын ерекше атап өтеді:
«Заң мен тәртіп» тұжырымдамасын іске асыру шеңберінде оқушылардың құқықтық мәдениетін қалыптастыру үшін адалдық, азаматтық жауапкершілік және заңға құрмет сезімін қазірден қалыптастырсақ, сол арқылы мемлекетшілдікті бойына сіңірсек дейміз. Құқықтық сауаттылық марафоны өткізудегі басты мақсат – сол! Аталған марафон – білім алушылар мен студенттердің құқықтық сауаттылығын арттыруға, құқықтық мәдениетті жүйелі қалыптастыруға бағытталған кешенді іс-шаралар кешені. Осыған байланысты, марафон аясындағы іс-шараларды жоғары деңгейде, сапалы, мазмұнды және белгіленген мерзімде ұйымдастырып өткіземіз. Іс-шаралардың мазмұны интерактивті форматтарды кеңінен қамтып, білім алушылар мен студенттердің белсенді қатысуын қамтамасыз етуге бағытталады», – дейді басқарма басшысы.
Айта кету керек, марафон барысында ашық дәрістер, семинарлар, пікірсайыстар мен практикалық тренингтер ұйымдастырылып, қатысушылар нақты құқықтық кейстерді талдау арқылы тәжірибе жинайды.
Бір аптаға созылатын мазмұнды іс-шаралар бағдарламасы
Марафон аясында әр күнге арнайы тақырыптық іс-шаралар жоспарланған. Алғашқы күні – 15 сәуірде құқықтық сауаттылық апталығының ресми ашылуы өтіп, қатысушыларға мотивациялық дәрістер мен интерактивті форматтағы кездесулер ұсынылады.
Келесі күндері оқушылар мен студенттер «Мен заңгер болсам…» атты шығармашылық жұмыстарға қатысып, өз құқықтық көзқарастарын эссе, бейне немесе презентация арқылы жеткізеді. Сонымен қатар, «Құқықтық сағат» форматындағы кездесулерде құқық қорғау органдарының өкілдерімен және ата-аналармен тікелей диалог орнатуға мүмкіндік беріледі.
Аптаның ортасында «Құқықтық мәдениет – саналы азаматтың негізі» тақырыбында сынып және кураторлық сағаттар өтсе, кейін «Жас медиатор мектебі» жобасы аясында қатысушылар қақтығыстарды бейбіт жолмен шешу дағдыларын меңгереді. Ал ерекше назар аударатын бағыттардың бірі – «Киберқауіпсіздік лабораториясы». Мұнда оқушыларға интернеттегі мінез-құлық ережелері, цифрлық этика және заң талаптары практикалық түрде түсіндіріледі.
Марафон «Мен – заңға құрметпен қарайтын азаматпын» атты қорытынды іс-шарамен аяқталып, белсенді қатысушылар марапатталады.
Бұл марафон – жай ғана білім беру жобасы емес, құқықтық мәдениеті жоғары жаңа буынды қалыптастыруға бағытталған маңызды қадам. Интерактивті форматтар арқылы заңды түсіндіру оқушылар үшін қолжетімді әрі қызықты болмақ. Нәтижесінде, қоғамда заңға құрмет пен жауапкершілік құндылықтары нығая түспек.
Бүгінде елімізде «Заң мен тәртіп» қағидатына айрықша басымдық беріліп отыр. Осы тұрғыда Астана қаласы да бұл бастамаға тың форматтағы мазмұнды жобалар арқылы үн қосып келеді. Құқықтық мәдениет марафоны – елдегі жүйелі өзгерістердің нақты көрінісі ретінде қоғамдағы құқықтық сананы жаңа деңгейге көтеруге бағытталған.
