Зардап шеккен әйелдің жағдайы ауыр көрінеді. Нақтырақ мәліметті қалалық денсаулық сақтау басқармасы өкілдері айтып берді, деп хабарлайды Tizgin.kz.
БАСҚАРМА ТАРАТҚАН МӘЛІМЕТ
Сәуірдің 12-сі күні “Көркем-3” тұрғын үй кешенінде болған өрттен үш бала бақиға аттанды. Зардап шеккен әйел №1 көпбейінді қалалық ауруханаға жатқызылған.
“Қазір пациент жансақтау және қарқынды терапия бөлімшесінде жатыр. Жағдайы ауыр деп бағаланған”, – делінген басқарма ақпаратында.
Аталған басқарманың баспасөз қызметі оқиға орнында жедел медициналық көмектің үш бригадасы жұмыс істегенін алға тартты.
МӘН-ЖАЙЫ
Айта кетейік, қайғылы оқиға 12 сәуірге қараған түні елордадағы Түркістан көшесінде орналасқан 21 қабатты тұрғын үйдің 15-қабатындағы пәтерлердің бірінде болды.
Пәтерден үш баланың мәйіті табылды. Өрт сөндірушілер бір әйелді құтқарып қалды, ол денесін күйік шалып, ауруханаға жатқызылды.
