NASA 2 сәуірге қараған түні ұшырылған «Артемида-2» ай миссиясы бойынша Жер бетінен 300 мың шақырым алыстан түсірілген фотосуреттерді жариялады.
Соңғы тәулікте «Артемида-2» экипажы түсірген фотосуреттер, сондай-ақ кеменің сыртқы бөлігіне орнатылған камералардан алынған кадрлар 4 сәуірде жарияланды.
«Артемида-2» – америкалық «Артемида» ай бағдарламасы аясындағы алғашқы пилотталған миссия және 1972 жылдың желтоқсанынан бері адамдардың Айға жасаған алғашқы сапары. Сол кезде Айға «Аполлон-17» экипажы барған болатын. Бұл жолы астронавттар Айды айналып ұшуы тиіс. Кейінгі сапарларда Айға 2028 жылы қону жоспарланған.
Кристина Кукпен бірге «Орион» бортында NASA астронавттары Рид Уайсмен (экипаж командирі) және Виктор Гловер, сондай-ақ канадалық астронавт Джереми Хансен бар. Хансен үшін «Ориондағы» бұл сапар – мансабындағы алғашқысы, ал миссияның қалған экипаж мүшелері бұған дейін бір реттен ғарышта болған (әр уақытта ХҒС-та жұмыс істеген), ал Кук әйелдер арасында орбитада үздіксіз ең ұзақ болу бойынша рекорд иесі (328 күн). Сонымен қатар, ол енді тарихта планетааралық кеңістікте болған алғашқы әйел атанды (Гловер – алғашқы қара нәсілді, ал Хансен – АҚШ-тан тыс алғашқы адам).
5 сәуірдe «Орион» мен Жер арасындағы қашықтық 300 мың шақырымнан асты. Бұған дейін NASA кеменің траекториясын түзету үшін жоспарланған маневрлік қозғалтқыштарды іске қосуды — екінші рет — тоқтату туралы шешім қабылдады. Есептеулер бұл түзетулердің әзірге қажет емес екенін көрсетіп отыр.
Ал «Артемида-2» экипажының жұмысына келсек, соңғы тәулікте астронавттар «Орионның» барлық жүйесінің жұмысын бақылауды жалғастырып, шағын тәжірибелер жүргізіп, түрлі жабдықтарды сынақтан өткізді.
Миссия әзірге айтарлықтай ақауларсыз жалғасып жатқанымен, мәселелерден толықтай құтылу мүмкін болмады: 4 сәуірде «Орионда» ғарыштық әжетхананың жұмысы қайтадан ішінара істен шықты. Егер миссияның алғашқы күнінде оны тек зәр жинау жүйесіндегі сорғыға су жеткіліксіз құйылғандықтан бірден іске қосу мүмкін болмаса, бұл жолы сұйық қалдықтарды кемеден сыртқа шығару жүйесі істен шықты.
