«Артемида-2» ай миссиясы аясында «Орион» ғарыш кемесі 1 сәуір күні АҚШ-тың шығыс жағалауы уақытымен сағат 18:35-те ұшырылды. Экипаж 10 күн ішінде Айды айналып ұшып, Жерге қайта оралады, деп жазады DW.
«Орион» ғарыш кемесінің бортында төрт астронавты бар «Артемида-2» (Artemis II) пилотталатын ай миссиясы сәрсенбі, 1 сәуір күні АҚШ-тың шығыс жағалауы уақытымен 18:35-те (Орталық Еуропа уақытымен 2 сәуірде 00:35-те) Флорида штатындағы Канаверал мүйісінде орналасқан Кеннеди атындағы ғарыш орталығының 39А ұшыру алаңынан сәтті ұшырылды.
Сол күні бұған дейін АҚШ-тың Ұлттық аэронавтика және ғарыш кеңістігін зерттеу басқармасы (NASA) хабарлағандай, әлемдегі ең ірі Space Launch System (SLS) зымыран-тасығышы 5 сағат ішінде 2,65 миллион литрден астам криогендік отынмен толтырылған, ал жанармай құйылғаннан кейін оның массасы шамамен 2,6 мың тоннаны құраған.
«Орион» экипажының құрамына Рид Уайзман, Джереми Хансен, Кристина Кох және Виктор Гловер енген. Виктор Гловер – ай миссиясына қатысқан алғашқы афроамерикалық, ал Кристина Кох – мұндай миссияға қатысқан алғашқы әйел-астронавт. Экипаж 10 күн ішінде Айды айналып ұшып, Жерге қайта оралады.
Алғашында «Орион» ғарыш кемесін ұшыру 2026 жылдың наурызына жоспарланған еді. Алайда 21 ақпанда NASA баспасөз қызметі ұшырылымның «белгісіз мерзімге» шегерілгенін мәлімдеді. Инженерлер кемені Жер маңындағы орбитаға шығаруға тиіс SLS зымыран-тасығышындағы гелий беру жүйесінен ақау анықтаған.
«Артемида-2» миссиясына дайындық барысында SLS зымыран-тасығышы мен «Орион» ғарыш кемесі 20 наурыз күні Флоридадағы ұшыру алаңына алдын ала орнатылған.
«Артемида» бағдарламасының үш кезеңі
Бұл жолғы ұшырылым АҚШ-тың жаңа ай бағдарламасының екінші кезеңіне сәйкес келеді. 2022 жылдың желтоқсанында «Артемида-1» миссиясы сәтті аяқталды: «Орион» ұшқышсыз режимде Айға ұшып барып, оның орбитасында бірнеше апта болып, кейін Жерге оралған.
Ал үшінші кезең – «Артемида-3» аясында 50 жылдан астам уақыттан бері алғаш рет адамзат Ай бетіне қайта қадам басуы тиіс.
NASA бұл бағдарламаны 2019 жылы жариялаған. Негізгі мақсат – АҚШ-тың Айға қайта оралуын қамтамасыз ету, тұрақты пилотталатын миссияларды жолға қою және болашақта Марсқа ұшулар үшін аралық инфрақұрылым қалыптастыру.
