Ақжайық басылымының жазуынша, Құлсарыдағы мектепте қатарластарына балта ала жүгірген оқушыны тергеу ісі әлі аяқталмаған. Соған қарамастан, сот оны үйқамаққа жіберіп, жасөспірім сабаққа қайта оралған.
Оқушының оқуын жалғастырып жатқаны туралы Атырау облысының білім басқармасында «Ақ Жайық» басылымына хабарлаған. Ведомство мәліметінше, жарақат алған екі оқушы әлі де емделіп жатыр. Балта тексеріс барысында табылмаған.
Сондай-ақ жасөспірімнің ауылдар арасындағы төбелестерге қатысуы мүмкін деген ақпарат та тексеріліп жатыр. Бұл эпизод бойынша әзірге түпкілікті қорытынды жасалған жоқ.
“Тергеу қорытындысы бойынша түпкілікті шешім қабылданады”, — деді Атырау облысы білім басқармасының басшысы Марат Әбуов.
Басқарма жасөспірімдер бұған дейін бір-бірімен дос болғанын хабарлайды. Соңғы уақытта олардың арасында жанжал туындаған, болжамдардың біріне сәйкес, бұл оқушылардың бірінің араласатын ортасының өзгеруіне байланысты болуы мүмкін.
Еске салайық, аталған оқиға бойынша қылмыстық іс қозғалды. Материалдар кәмелетке толмағандар істері жөніндегі комиссияға жолданды. Тергеу қорытындысы бойынша іске қатысы бар барлық адамның әрекетіне құқықтық баға берілмек. Сонымен қатар, Оқу-ағарту министрлігінің комиссиясы да болған жағдайға өз бағасын беруді көздеп отыр.
