Ауыл шаруашылығы министрлігі агроөнеркәсіп кешенінде субсидиялау тәртібін реттейтін бірқатар нормативтік құжатқа өзгерістер енгізді, деп хабарлайды Tizgin.kz Kazinform агенттігіне сілтеме жасап.
ҚАУЛЫ КҮШІНЕ ЕНЕДІ
Аталған құжат өңдеу кәсіпорындарын, асыл тұқымды мал шаруашылығын дамыту, сондай-ақ өсімдік шаруашылығы өнімдерінің өнімділігі мен сапасын арттыру үшін субсидиялаудың жаңа ережелерін енгізуді қарастырады.
Қаулы бүгіннен бастап күшіне енеді.
Өзгерістерге сәйкес, өңдеу кәсіпорындары ауыл шаруашылығы өнімдерін терең өңдеу үшін сатып алу бойынша субсидияларды «электронды үкімет» порталы арқылы электронды түрде өтініш берген жағдайда ала алады. Өтініштер мемлекеттік субсидиялау жүйесінде тіркеліп, электронды цифрлық қолтаңба арқылы растаудан өтуі тиіс.
СУБСИДИЯ АЛУШЫЛАРДЫ ТАҒЫ БІР ӨЗГЕРІС КҮТІП ТҰР
Негізгі талаптардың бірі – өзара міндеттемелерді орындау. Субсидия алушылар агроөнеркәсіп кешенінің жалпы өнім көлемін өткен жылғы деңгейде сақтауды қамтамасыз етуі керек. Бұл талап жылына 100 млн теңгеден астам мемлекеттік қолдау алатын кәсіпорындарға қолданылады. 2029 жылғы 1 қаңтардан бастап өзара міндеттемелер барлық субсидия алушы агроөнеркәсіп кешені субъектілері үшін міндетті болады.
Сондай-ақ, міндеттемелердің орындалуын растау тәртібі нақтыланды. Ол үшін мемлекеттік субсидиялау жүйесі мен электронды шот-фактуралар жүйесі арасындағы ақпараттық өзара әрекеттесу қолданылады. Бұл ауыл шаруашылығы өнімдерін сатып алу мен дайын өнімді сату процесін растайды.
СУБСИДИЯҒА ШЕКТЕУ БАР МА
Егер кәсіпорын міндеттемелерді орындамаса, онда ол субсидия алуға өтініш бере алмайды. Алғашқы бұзушылықта шектеу бір жылға енгізіледі, екінші рет бұзылған жағдайда – екі жылға.
Құжат сондай-ақ агроөнеркәсіп кешенінің жалпы өнім көлемін есептеу әдістемесін нақтылайды. Есептеу өнімнің көлемі мен Ұлттық статистика бюросы жариялайтын орташа республикалық бағалар негізінде жүргізіледі.
Атап өту керек, осыған ұқсас талаптар мал шаруашылығы мен өсімдік шаруашылығы саласындағы тауар өндірушілерге, асыл тұқымды мал шаруашылығын дамыту, өнімділік пен егін өнімділігін арттыру үшін субсидия алатын кәсіпорындарға да енгізіледі.
