Айлық есептік көрсеткіштің (АЕК – МРП) өсуіне байланысты жол қозғалысы ережесін бұзған жүргізушілер айыппұлды 2026 жылдан бастап 10 пайызға артық төлейді. Айыппұлдардың теңгемен қанша болатынын Tizgin.kz порталы осы мақалада есептеп шығарды.
2026 жылы айлық есептік көрсеткіштің (АЕК) мөлшері 4 325 теңге болып бекітілді. Енді ең жиі кездесетін айыппұлдарды қарастырайық.
Жылдамдықты арттырғаны үшін (ӘҚБтК-нің 592-бабы):
Көлік құралының белгіленген жылдамдығын асыру келесі мөлшерде айыппұл салуға әкеп соғады:
-
10-20 км/сағ – 5 АЕК, яғни 21 625 теңге;
-
20-40 км/сағ – 10 АЕК, яғни 43 250 теңге;
-
40-60 км/сағ – 20 АЕК, яғни 86 500 теңге;
-
60 км/сағ және одан жоғары – 40 АЕК, яғни 173 000 теңге.
Рөлде отырып телефон пайдаланғаны үшін (ӘҚБтК-нің 591-бабы):
Көлік құралын басқару кезінде жүргізушінің телефонды немесе радиостанцияны пайдалануы 5 АЕК көлемінде айыппұл салуға негіз болады. Бұл 21 625 теңгеге тең.
Түтіні көп немесе шулы шығарындылы көлікпен жүру (ӘҚБтК-нің 334-бабы):
Шығарындыларындағы ластаушы заттардың мөлшері немесе жұмыс істеу кезіндегі шу деңгейі белгіленген нормадан асатын автомотокөлік құралдарын пайдаланғаны үшін мынадай айыппұл көзделген:
-
жеке тұлғаларға – 10 АЕК, яғни 43 250 теңге;
-
заңды тұлғаларға – 100 АЕК, яғни 432 500 теңге.
Осы құқық бұзушылық айыппұл салынған күннен бастап бір жыл ішінде қайталанса,
-
жеке тұлғаларға – 20 АЕК (86 500 теңге),
-
заңды тұлғаларға – 200 АЕК (865 000 теңге) мөлшерінде айыппұл салынады.
Артық жүк тиеу, қауіпсіздік белдігін және шлемді тақпау (ӘҚБтК-нің 593-бабы):
Жолаушыларды немесе жүктерді тасымалдау ережелерін сақтамағаны үшін 5 АЕК көлемінде, яғни 21 625 теңге айыппұл салынады.
Көлік құралының кабинасынан (салонынан тыс) жолаушы тасымалдау, сондай-ақ қозғалыс кезінде олардың терезеден немесе люктен басын шығаруына, есіктерді ашуына жол беру 10 АЕК (43 250 теңге) мөлшерінде айыппұл салуға әкеп соғады.
Қауіпсіздік белдігін тақпай немесе бекітілмеген мотоцикл шлемімен жүру 5 АЕК, яғни 21 625 теңге көлемінде айыппұл қарастырады.
Озу ережесін бұзу, жолда дұрыс орналаспау (ӘҚБтК-нің 596-бабы):
Жол қозғалысы ережелерін бұза отырып жаяу жүргіншілер жолымен, жол жиегімен немесе тротуармен жүру 15 АЕК мөлшерінде, яғни 64 875 теңге айыппұл салуға әкеп соғады.
Жол қозғалысы ережелерімен тыйым салынған жағдайларда, соның ішінде бұрылу немесе кері бұрылу кезінде қарсы бағыттағы қозғалыс жолағына шығу көлік құралын басқару құқығынан 6 ай мерзімге айыруға әкеледі.
Тоқтау немесе тұрақ ережесін бұзу (ӘҚБтК-нің 597-бабы):
Осы баптың 2 және 3-бөліктерінде көзделген жағдайларды қоспағанда, тоқтау немесе тұрақ ережелерін бұзу 5 АЕК, яғни 21 625 теңге айыппұл салуға негіз болады.
Тротуарға, гүлзарға, көгалға, балалар немесе спорт алаңына тоқтау немесе тұраққа қою 10 АЕК (43 250 теңге) мөлшерінде айыппұлды көздейді.
Қозғалыс бөлігінде тоқтау немесе тұрақ ережесін бұзу салдарынан басқа көліктердің қозғалысына кедергі келтірілсе, 10 АЕК (43 250 теңге) айыппұл салынады.
Мүгедектігі бар адамдарға арналған көлік тоқтайтын немесе тұрақ қоятын орындарға заңсыз қою 10 АЕК (43 250 теңге) айыппұл салуға әкеледі.
Ақылы тұрақ үшін төлем жасаудан жалтару 1 АЕК, яғни 4 325 теңге мөлшерінде айыппұлды көздейді.
Қиылыстардан өту ережесін бұзу немесе жолды кесіп өту (ӘҚБтК-нің 594-бабы):
Қиылыста көлік кептелісі бар екеніне қарамастан жол айрығына шығып, соның салдарынан көлденең бағыттағы көліктердің қозғалысына кедергі (тығын) келтірсе, ескерту немесе 3 АЕК (12 975 теңге) мөлшерінде айыппұл салынады.
Артықшылыққа ие көлікке жол бермеу
Қиылыстардан өту кезінде артықшылық құқығын пайдаланатын көлікке (полиция, жедел жәрдем, өрт сөндіру техникасы және арнайы қызметтер) жол бермеу 15 АЕК, яғни 64 875 теңге мөлшерінде айыппұл салуға әкеледі.
Маневр жасау ережесін бұзу (ӘҚБтК-нің 595-бабы):
Қайта жолақ ауыстырмас бұрын, бұрылу, кері бұрылу немесе тоқтау кезінде бұрылыс көрсеткішін қоспау 5 АЕК, яғни 21 625 теңге айыппұл салуға негіз болады. Тыйым салынған жерлерде артқа қарай жүру 10 АЕК (43 250 теңге) мөлшерінде айыппұлды көздейді.
Бағдаршамның тыйым салынған сигналына өту (ӘҚБтК-нің 599-бабы):
Бағдаршамның тыйым салынған сигналына немесе реттеушінің тыйым салатын ишарасына өту 10 АЕК, яғни 43 250 теңге көлемінде айыппұл салуға әкеп соғады.
Бағдаршамның сары сигналы да қызыл сигнал сияқты тыйым салынған болып саналады.
Жаяу жүргіншілерге немесе өзге қатысушыларға жол бермеу (ӘҚБтК-нің 600-бабы):
Көлік құралын басқару артықшылығын пайдаланатын жүргізушілерден басқа жағдайларда, жаяу жүргіншілерге немесе жол қозғалысының өзге қатысушыларына жол бермеу 10 АЕК, яғни 43 250 теңге айыппұл салуға әкеледі.
Жол белгілері мен жолақ сызбасын сақтамау (ӘҚБтК-нің 601-бабы):
Жол белгілері немесе жолдың жүріс бөлігіндегі жолақ сызбалары талаптарын сақтамау 3 АЕК, яғни 12 975 теңге мөлшерінде айыппұл салуға негіз болады.
