Қазақстандағы тұрғын үй бағасы өсіп келеді, алайда бұл тек құрылысшылар шығынымен байланысты емес. Мұндай тұжырымға сарапшылар нарықтағы жағдайды саралай отырып келді, деп хабарлайды Tizgin.kz Orda.kz-ке сілтеме жасап.
БІР АЙДА БАҒА ҚАЛАЙ ӨЗГЕРДІ
Статистикаға сәйкес, 2025 жылдың қарашасында Қазақстандағы жаңа тұрғын үйдің бір шаршы метрі орта есеппен 568,8 мың теңге болды. Бір айда баға 2,5 %-ға қымбаттап, жылдық өсім 15,5 %-ға жетті.
Ең қымбат жаңа тұрғын үй Алматыда сатылады: мұнда бір шаршы метр үшін орта есеппен 690,6 мың теңге сұралады. Ал ең төменгі бағалар Оралда тіркелді – 299,1 мың теңге. Жылдық есепте бастапқы нарықтағы баға өсімі инфляциядан асып түседі; қарашада ол 12,4 % болды.
AERC аналитиктері тұрғын үй бағасының өсуін құрылыс шығындарының қымбаттауымен қабыспайтынын атап өтті. Бір жылда құрылыс жұмыстарының құны тек 2,2 %-ға өскен. Бағаның өсуіне құрылысшылар шығындары емес, сұраныс пен нарыққа жат факторлар әсер етіп отырған көрінеді.
«Нарық ішінде бағаның өзгеруі тұрғын үй класына байланысты әртүрлі. Қарашада элиталық сегмент қымбаттады – бір айда 9,3 % өсім тіркелді. Комфорт-класс тұрғын үй керісінше, 14,6 %-ға арзандады, эконом-класс – 1,6 %-ға төмендеді. Бұл құрылысшылар акциялары мен маусымдық түзетулерге байланысты», – деп хабарлады AERC.
САРАПШЫЛАР БОЛЖАМЫ
Аналитиктер болжамынша, қысқа мерзімде баға тұрақталады. Алайда 2026 жылы өсу қарқыны күшеюі мүмкін. Оған үлес қосатын факторлар ретінде серіктестік құрылыс ережелерінің қатаңдауы, зейнетақы жинақтарын кеңінен пайдалану және қосылған құн салығының өсуін айтуға болады.
Бұған дейін экономист Ғалым Құсайынов жаңа Салық кодексі тұрғын үй бағасын күрт көтеруі мүмкін екенін ескерткен. Оның бағалауынша, ҚҚС өсімі құрылысшылар рентабельділігін төмендетіп, олар шығынды бағаны көтеру арқылы өтеуге мәжбүр болады. Мұндай жағдай әсіресе, өңірлерде байқалады.
Сонымен қатар, БЖЗҚ-дан тұрғын үй жағдайын жақсарту үшін аударымдар 2025 жылдың тоғыз айында 449,7 млрд теңгеге жеткені хабарланған. Сарапшылар бұл нарыққа жат қаржы ағыны сұранысты қолдайтынын, бағаны өсіріп, тұрғын үй нарығының мемлекет көмегіне тәуелділігін арттыратынын атап өтті.
