Алматыда интернетте діни бірлестіктерге қатысты жарияланымның астына жарылыс жасау туралы қауіп төндіретін пікір қалдырды деген күдікпен жас жігіт ұсталды, деп хабарлайды КазТАГ.
Алматы полиция департаментінің мәліметінше, интернет-ресурстардың біріндегі діни ұйымдардың қызметі туралы жазбаның астына белгісіз қолданушы жарылыс жасалуы мүмкін екенін меңзеген қорқыту мазмұнды пікір қалдырған. Бұл ақпарат «102» пультіне тіркеліп, оқиғаға экстремизмге қарсы іс-қимыл басқармасы дереу әрекет еткен. Жедел іздестіру шаралары барысында пікір авторының жеке басы анықталып, ол полиция бөліміне жеткізілген.
Полиция күдіктінің 2004 жылы туған Алматы қаласының тұрғыны екенін хабарлады.
“Экстремизмге қарсы іс-қимыл басқармасының бастығы Асхат Дәулетияровтың айтуынша, интернеттегі жазбаларда қалдырылғандарды қоса алғанда, кез келген қауіп-қатер қоғамдық қауіпсіздікке төнген нақты қауіп ретінде қарастырылады. «Мұндай «әзілдердің» салдары ауыр болуы мүмкін. Әрбір хабарлама мұқият тексеріліп, кінәлілер заң талаптарына сәйкес жауапқа тартылады», — деді ол.
Алматы полициясы тұрғындарды әлеуметтік желілерді жауапкершілікпен пайдаланып, қорқыту немесе заңға қайшы мазмұндағы хабарламаларды жариялаудан және таратудан сақ болуға шақырды.
