Қытайдың әскери-саяси элитасында бұрын-соңды болмаған даулы оқиға басталды. Бейжің ресми түрде «тәртіп пен заңды өрескел заңбұзушылық» деп сипаттаған жайттар іс жүзінде армия ішіндегі билік балансына соққы болып тиюі мүмкін.
Женьминь жибао: Бейжіңнің ресми мәлімдемесі
ҚХР қорғаныс министрлігі сенбі күні Қытай армиясындағы ең ықпалды тұлғалардың бірі — орталық әскери кеңес төрағасының орынбасары, ҚКП орталық комитеті саяси бюросының мүшесі Чжан Юся мен орталық әскери кеңестің біріккен штабының бастығы Лю Чжэньли тергеуге ілінгенін хабарлады.
Ресми ақпаратқа сәйкес, аталған шешімді Қытай коммунистік партиясы орталық комитеті қабылдаған. Министрлік бұл істі «тәртіп пен заңды өрескел бұзу» деп қысқаша сипаттады. Қытай саяси лексиконында мұндай тұжырым әдетте жемқорлық пен билікті асыра пайдалану айыптарын білдіреді. Алайда тергеудің нақты мән-жайы мен ауқымы ашық айтылған жоқ.
The Washington Post: армиядағы билік теңгерімі бұзыла ма
Америкалық The Washington Post басылымы бұл істі Қытай халық-азаттық армиясындағы соңғы онжылдықтардағы ең ірі жемқорлық жанжалдардың бірі деп бағалайды. Газет дерегінше, егер Чжан Юся қызметінен кетсе, бұл 1989 жылғы Тяньаньмэнь алаңындағы оқиғалардан кейінгі Қытай армиясындағы ең ауқымды кадрлық сілкініс болмақ.
Басылым сондай-ақ бұл жағдай Қытай төрағасы Си Цзиньпин қолындағы әскери биліктің бұрын-соңды болмаған деңгейде шоғырлануына әкелуі мүмкін деп жазады. Ал Financial Times дерегінше, антикоррупциялық тексерістерден кейін қарулы күштерді басқаратын орталық әскери кеңесте бар болғаны екі ықпалды тұлға ғана қалған, соның бірі — Қытайдың өзі басқаратын көшбасшысы.
Сарапшылардың пікірінше, Си Цзиньпин 2012 жылдан бері орталық әскери кеңесті басқара отырып, жемқорлықты «мемлекетке төнген ең үлкен қатер» деп атап келеді. 2013 жылдан бастап басталған кең ауқымды антикоррупциялық науқанның нәтижесінде ондаған генерал мен жоғары лауазымды шенеунік қызметінен айырылды. Дегенмен сыншылар бұл науқанды билік ішіндегі ықтимал қарсыластарды шеттету құралы ретінде де қарастырады.
Соңғы айларда Қытай билігі армия қатарындағы тоғыз жоғары шенді офицерге қатысты тергеу басталғанын жариялап, бірнеше ықпалды генералды қызметінен алған. Чжан Юся ісі осы үрдістің ең шулы әрі саяси салмағы ауыр кезеңі болуы мүмкін.
